屯門/荔枝角, 姓李的

詳細大家慢慢睇~ 由懷疑,到肯定,直到採取行動!

終於有殼做蝸牛而唔係寄居蟹,心情真係興奮都極點.
所以第一間屋,希望裝修得好好睇睇,
(之前住架都只係咁易由老公自己親手油油)
今次係人生第一次裝修,為左隆重其事,
上手住過架無得留低,成間推倒再重新間房,
水喉電制同時重新拉過做過.
加上住頂樓,以及明眼見到有滲水地方,防水工程亦十分浩大.

之不過資金緊拙,四出打價之後,
終於叫拍人地心口搵到一間價錢十分合心水的公司來裝修,
工程重點包括:
1)全屋打拆清垃圾
2)重間廁所同2間房(廚房開放式)
3)新造廚櫃,鏡櫃以及電視機櫃
4)重做來去水位,電位,燈位
5)全屋加裝窗花
6)全屋鏟灰上油
7)廚房/廁所鋪磁磚
8)其他地方鋪木地板
9)全屋防水工程

惡夢架開始就係C6太好人,太易信人.
裝修公司係佢朋友個老死,大家事前見過3次(上新居睇環境,度尺同打價),
傾落岩咀形,C6又半個行內人,又有住附近架公公幫眼幫口
(公公都係半個行內人)再加上,本身四出打價時,佢地以友情最優惠價做
所以,C6同我都意屬由佢做

好啦,雖然係熟人,但唔代表唔需要簽約
份約係由我呢個完全的行外人草稿,最後由C6同對方傾
裝修公司無好正式出過份報價單,但因為我地係傾好價錢,
所以合理無詳刊細項,以總價形式簽訂左個單位裝修

房點間,廚櫃,鏡櫃以及電視機櫃幾大,雖然C6有度,但怕錯,
所以係事前都捉左裝修公司過黎傾,只係差3個櫃架式樣未定
同時,單位內邊度有燈邊度有咩,都一而再,再而三地同裝修公司講左
為左慳錢,我地選用德利板,因為知道焗柒好貴,
而裝修公司都CONFIRM左,同比埋本SAMPLE我地話除左金屬面,咩都包

一心諗住無咩問題,當時裝修公司只係話怕不能如常日子交樓
我同C6都話,有得傾,可以改日子,不過佢地後來又話6月3日ok就咁簽左


第一個問題
地方有限,設計亦有焗限,想要住得舒服,
間房係半吋都唔可以間錯,所以彈墨時
我,C6同埋公公,再加上裝修公司3個代表
係上面傾,而係同時,
我就開始追開佢地廚櫃,鏡櫃以及電視機櫃架樣
當日唔止一次同佢地講個廚櫃好大(真係好大...因為開放式)
佢地都okok咁,之後技術上,公公同C6同佢地傾
來去水,電位要點MARK,我就提下燈位,窗花個d
當時,裝修公司話房做四面燈,唔加吊燈(因為C6好想整吊燈,所以都嘈左一陣)
我話好,亦都講左廚房同廳位中間要做燈糟
唯一留左係無講假天花點做

間房日之後2日,裝修公司通知,
屋外的入水喉係舊式,要換銅喉,因為有小朋友,怕飲d鐵質水
個時我非常唔開心,因為裝修公司話要加錢換,佢話要4千蚊!
個時我好忟,覺得4千蚊好唔合理,仲係呢度出POST問有無師傅介紹
後來,好在公公住附近,由公公介紹左個師傅換,只係千六蚊!!

C6後來話我知,裝修公司話佢地收4千換喉,會由明喉轉暗喉
又靚仔又安全wo...我當時立即罵爆C6話,住多幾年要再換喉又點
作爆wall拎出黎再換啊?對面左右都係明喉黎,搞咩我地要整暗喉?
佢由始至終,講收4千蚊時有無講過係由明轉暗?有無問過駛唔駛由明轉暗?
佢做咩無啦啦打個由明轉暗架價比我?我根本唔要!

唔知係唔係C6同佢講我個次的爆發,惡夢就正式開始...


第二、三個問題
我上去新居望,發現未出櫃架圖樣就拉左水喉電制,
我當時O左咀問C6,係唔係C6同佢CONFIRM?
C6話,無CONFIRM水,不過電制有,
ok,我就同C6講,洗手盆位同爐頭位要掉轉,再拉過
洗衣機去水位要做低唔係高,要求佢地改
佢地就話改野要加錢點點點,我就爆佢地話
圖都未出,我無肯定過,係你地自己亂咁整
最後,佢地死死地重新整過D位

同時,我趁機CONFIRM個D燈位,佢就忽然話
間房4面燈又改成1面，廚廳燈位要做燈糟又要加錢
我話佢房改一面我有保留唔知夠唔夠光,唔夠一定要做返比我
而個廚廳燈位一早話左做燈糟,咩事唔見左?
佢地又賴個廚房個假天花位,拉到個度做唔到燈位,又話射燈仲好睇
就係死都唔願做個燈糟比我,或者係叫一定要加錢先肯做比我

跟住我就O左咀問佢,邊個叫做個假天花拉到咁低?
我本人都有咁上下高度,個天花拉咁底係想點?扮小人國?
佢地話慣性都係咁做架啦,仲話我要求奇特
呢個時候,我忍唔住打比C6個朋友,爆佢
C6個朋友都驚左我話:佢地無預個燈位係佢地唔岩,個燈糟你要做,我比錢啦!
我同C6個朋友話,唔係錢架問題(其實都有關係架)而係佢地無啦啦自動波
CONFIRM左D野,我都唔知幾時同點解會變成咁,我話唔係咁做架時候
就話我「改野」,我無改過野,因為之前都唔係我或者C6話咁做
係佢無啦啦整左,然後唔係我想要架,就硬逼我要
最後,裝修公司仲唔肯認錯話一定要加錢先裝
我無奈被逼話唔裝,我知道我硬要裝架,C6個朋友就會出錢
不過呢個唔係我想見到架結局...咁個廚廳燈位叫SETTLE左
而個假天花,就要我C6做埋工人
係上面畫左成個下午,要求佢地升高大概半吋多D

而就係呢半吋位多D位,我同裝修公司第三次衝突
原因係個廚櫃,唔知點解個天花底高多半吋多D
裝修公司就話個廚櫃SIZE會唔同左,而要求我比多萬八蚊
我個下火都不得了,問佢:只係升高個櫃半吋多D
中間個鏡鋼位多左半吋多D,就要萬八蚊?我家下買左鑽石鋼呀?

佢地回覆話係誤會左要重整個廚櫃,個SIZE唔同左,
做高左半呎多D個價錢唔同左
我仲火,話成個尺形櫃,係120吋(10尺)長X106吋(8尺10)長
你收我個萬八蚊,係唔係打算整多一座8尺廚櫃比我?

裝修公司又唔知兜左去邊,最後話只係升高個櫃當然唔加錢啦!


第四個問題
香港天氣突然幾個鐘之內三級跳
落左一場超級大雨,令又一城變左水舞間架同時
亦都令我發現左原來新居個窗外滲水入屋
急急同裝修公司講呢件事,請佢地注意個防水要做好
佢地話唔關佢地事,要我們加錢整個防水
仲話窗外要搭棚,所以要收最少萬五蚊
我唔明,合約上面明明要求做全屋防水
佢都可以話唔關佢事,佢話因為係屋外,唔係屋內...
我話成間屋佢都未做防手,已經成個月,咩都無
連3個櫃咩樣都未有,佢地想點

個次談話我架粗口認識又加深唔少
最後係C6同佢地講,話要我地出錢買多罐防水油,
佢就伸隻手向出面做

我更無言...如果係可以伸隻手整架,點解一早唔講?
要同我粗口對決? 想點先?
後來,我地搵管理處問窗外滲水位,
管理處話要業主處理,非管理處問題...
到今日,防水油係未買架,亦都未決定如何處理


第五個問題
係我仲研究緊搭唔搭棚做架時間
裝修公司突然同C6講個廚櫃計錯數
我們要求個尺寸一定要加錢先可以造
仲表示,如果我地唔加錢佢就唔再做落去...

家下間屋架狀態連同我架心態都係一片混亂

1)地台未做
2)防水未做
3)電線未拉好
4)浴缸裝左,但未封
5)熱水爐裝左,但未駁
6)部份裝修垃圾未清

...根本就一片爛地...


半反臉
冷靜左一輪,C6勤左上去睇
以防佢地做手腳,亦間唔中見到2個負責人之一(稱為肥師傅,另一個係瘦師傅)
肥師傅負責水電,而且亦都負責搵工人做野
佢呢幾日都有上去整水電,
亦不時同我老公探口風,之後因為呢件事
我同老公吵都又嘈要離婚咁制
最後,我同老公話,件事我跟返,我做返話事個位,叫佢地搵我傾,
最後,肥師傅打左電話比我,而我就錄左音
大致內容係由佢原本唔承認自己的錯到最後承認係自己的錯
1)入屋水喉,事前唔通知我地要換,加錢換係無問題,問題係遲左講,我不滿=道歉自己睇留
2)由DAY1已通知要做個大廚櫃,死賴無聽過,又話我地改黎改去=認係佢地問題,係佢地聽留左,無用心
3)由DAY1已通知做燈槽,又話燈槽係佢SUGGESTION而唔係我地話要做,結果計錯數就賴我地無講過燈槽=最後當然係比我搵返証明,話燈槽一早講左要做,係佢地計錯,無睇,唔聽,唔係我地問題
4)由DAY1已話老人家因住附近會上去睇,兩老意見不用理會,最後搵我確定點做就得,千其唔好同佢地吵,因老人家身體不好,如真的覺得好煩,立即打電話找我,我會出口叫走兩老.然而佢地有日同兩老有口角,激到公公嬲到唔舒服左2日,而且當日係我上兩老家接小朋友才知道發生了口角事件=呢個佢直接道歉,因為個句說話,我係面對面同佢講左至少3次,佢地都忍唔住,而且瘦師傅仲用呢個原因賴係兩老改設計,比我爆左一獲(粗口LV UP)

而同時,佢地承認自己計錯條數方面,我話唔係無得傾,加錢係無可能
但我會睇下有咩地方可以減去,改平D,等佢地唔需要蝕咁多
暫時,因為肥師傅願意傾,所以事情無原先咁灰
只不過個,瘦師傅…好可能唔會再見到佢,雖然佢負責泥水
真反臉
約左一日當面傾,對方話合約係我逼佢簽,
然後佢要打爛間屋,威脅我比錢.
完全係黑社會手法,大家千萬唔好幫親佢
事到如今,我去左報警
而警察做左個中間人,對方同左警察講唔做

之不過過左1日又唔知幻聽定失聰,
無啦啦話係我地唔比佢做,
當然,我地話係你自己同警察講唔做架!
然後佢就話唔比返令佢滿意架金額,佢係唔會清野走架

姓李架發現佢架黑社會兇人手法不行
就搵左個中間人=就係當初呃左我老公簽約架肥鄧!
阿肥鄧話自己只負責做電,同我地要求收返條數
又話個場架野係佢架~
當中又兇又哄~出爾反爾+恩覺失調~

堅持到底就是最終勝利?

well, 同時已搵民政事務署,掛期見律師
另外, 會正式向消費者委員會投訴