遇到無良裝修佬(觀塘區)(黑店)

公司：

觀塘區(黑店)

人：一個無良裝修佬(大概50幾歲，牙都就冇曬)

事件：
係經老豆朋友介紹的~因為老豆想搵個收費老實的師父裝修~希望不會太貴~但這個師父手腳慢都算(一日裝一隻窗框，整左成個月都未有其他野係整好)~因為可能平的關係, 我俾你慢慢做~但慢慢做手工應該不差吧!但佢做牆身的批盪時……條友批到裝身有啲小山丘咁，仲要係好多幅牆都係咁,時間過左3個月終於都開始鋪地磚，地磚叫做鋪得最快，但都係有啲高低不平。終於等到唔知點解訂左成個月嘅廚櫃送到，我記得個晚我一收工即刻上去睇下有冇問題，一上到去見到個師父係到細細聲講 大獲啲位做得唔岩，之後佢見到我上黎就走左，唉……第日上去見佢竟然想將錯就錯將個廚櫃裝上去，好彩我地上去再睇叫停佢……我之後同佢講不如再訂過一套櫃啦，我地自己會俾錢，叫佢做其他野先, 反正仲有好多野都未整，但佢唔領情之餘 仲發神經咁玩左一個星期失蹤，我地搵唔到佢，而佢啲工具都仲係度冇拎走過，我地想搵人接黎再做都唔得，過左一個星期佢自己走返黎話會做，咁我地諗住都俾佢做埋佢就算(雖然都知佢一定會更加冇心機做)，冇耐就裝埋啲門，但啲門點會冇問題呀~啲門裝完都關唔到門，真係吹脹，最後到油油佢仲要用水溝到好稀~油完好似冇油咁……油左兩日我地終於頂唔順叫佢走……但老豆竟然已經俾埋第三期錢俾佢……唔怪得個兩日咁好禮貌咁……唉…真係當送走佢算數…一單野佢做左半年都未攪掂……最後搵人整過曬啲野……個裝修叫做好返少少……最後仲差一萬蚊倒尾數冇俾佢……本來我地諗住約佢出黎清埋佢條數佢唔使煩……但佢自己亂講話我地仲差佢3萬蚊……得一萬佢唔收……咁樣緊係唔俾佢啦…唔要算數! 事隔一個月倒就收到屋宇署話有人舉報, 要入黎查有冇拆主力牆，我心諗我地都冇亂拆野, 拆野都問曬佢意見, 應該唔會咁玩野掛……點知原來佢幫我拆左廁所牆身主力柱, 批左3cm厚度 ……最後依家要還原……哩條友真係超級無良……現分享此文希望大家搵人做裝修要更加小心~